حكاية شاب مصرى !!

ف 2016 كنت بشتغل ب1500 جنية ف الشهر  فى شركه فى المعادى.. وقت ما الدولار غلي وقفز قفزه كان ب8 جنية يعني قول كنت بقبض 190 دولار مثلا
كنا بنتغدى ب20 جنية مثلا وتذكره المترو بجنية ومواصله جوا المعادى بجنيه ونص كمان
كان البيبسي ب3ونص حاجه كدا
اشتريت موبيل بالفين جنية تقريبا او اقل

يوم 2 نوفمبر 2016 الدولار بـ 8ونص .. كدا مرتبي ده بقى 175 دولار
يوم 3 نوفمبر 2016 الدولار بـ13ونص .. مرتبي 111 دولار
يوم 8 نوفمبر 2016 الدولار ب17 ونص .. مرتبي الحمد لله 85 دولار

متخيل ف شهر بتاخد نفس الفلوس قيمتها قلت للنص ف يوم واحد
متخيل يا معلم !
يعني حتى مفيش وقت تقول فيه انك اتاخرت ف تطوير نفسك ومعرفتش تلاقي شغل احسن لا لا ملكش ذنب .. ده ف ليلة واحد .. بضعة ساعات يا معلم

طب الحمد لله وبقى عندي شغل احسن ومن هنا فريلانس وهنا بارت تيم ومعرفش ايه
متوسط مرتبي بقى 4000 جنية .. يعني حوالي 200 دولار (يعني رجعت لقيمة الـ الف ونص تاني وقت ما كان الدولار ب8 فاكر! )

اليوم بالنسبالي 104 جنية
مواصلات 44 جنيه
واكل انا وزوجتى هنقول 60 جنيه
انا متكلمتش على مصاريف تانيه كتير البيت بيحتجها ولا بعد مربنا يرزقنى بطفل

يعني بصرف 75 - 80% من المرتب ف اساسيات حياتي .. اكل وشرب ومواصلات
انا متكلمتش لو ف مره هشتري تي شيرت او هاخد زوجتى ناكل ايس كريم مثلا
لو فكرت اشتري حاجه للكمبيوتر
كل مره شغلي مرتبه بيزيد فيه بيبقى عند طموح اني هحوش منه واجيبلي حاجه او اسافر ف حتة
انا كنت بصرف الف جنية من 1500
دلوقتي بصرف 4000 جنية من 4000 جنية (لسا الحاجه هتغلى انهارده)

وانا بشحن رصيد والراجل بيقولي انا بعتلك ب45 جنية عشان اسدد ال25 جنية اللى مستلفهم وشحنتلك بـ 30 تاني عشان الباقه ب25
انا ضحكت وهو بيقولي الجمله دي .. ضحكت ضحك بجد وكنت مخنوق جدا
30% ضريبه ! .. تلت فلوسك ضريبه
لو فكرت تجيب اي حاجه من اي حتة 14% ضريبه
لو هتعمل اي حاجه غير انك تشتغل وتتفشخ هتدفع غرامات وضرايب

كان نفسي اغير اللاب علشان شغلى
كان نفسى اجيب هديه  كويسه لزوجتى
كان نفسي اسافر ..
كنت عايز اشتري كاميرا
فكرة اني اشتري اسكوتر دي حرام اصلا

كان نفسي يبقى معايا مبلغ بعد الشغل احس اني عملته واشتغلت ومعايا فلوس بس انا مغصوب اصرف تلت تربع اللى بشتغل بيه
انا مش مُصرف اوفر ولا بجيب حاجات ملهاش لازمه على الفاضي
ده انا بسترخص والله حتى

البلد بتاخد الفلوس اللى بشتغل بيها
بتهد فيا وبتبني عاصمة ادارية ومباني للوزارت والسفارات
بتهد فيا وبيوزعوا فلوسي في كل حتة على مزاجهم وغصب عني
بتهد فيا وبتسرقني وياريتهم بيعملوا حاجه عدله تنفع غيري

محدش فاهم ده او محدش مديك اعتبار اصلا
وانا مش لوحدي اللى حاسس بده ولا انا لوحدي اللى ف الساقيه دي

ده انا لسا يادوب 25 سنه وحالتي كدا مش متخيل كمان شويه لما ربنا يرزقنى بطفل الحال هيبقى ايه

يارب طلعني من هنا يارب ..
انا بكره كل حاجه في البلد دي

_____
ملحوظه مهمه انى انا عايش تقريبا مع والدى وولدتى
ياعنى تقريبا موفرين عليا اكتر من نص مصاريفى
____
للتوضيح بس
يا جماعه انا مش بشتكي حالي ولا حاجه الحمد لله
انا بس بقول اننا بنعتب عشان نعيش افضل ونكسب اكتر بالتوازي مع ان الفلوس دي قيمتها بتقل بشكل كبير وبيطلع اللى ياخدها منك بدون توظيف صحيح وبدون عائد عليك
ف ده بالنسبالي ضغط نفسي وشئ بيحسسني بضيق وكره للبلد
غير كدا بقى الله يكون في عون المتضررين من اللغبطه دي ويعين الناس على التزامتها